Supervision & survey

Norska verkfræðistofan Vik og Sandvik hefur falið sérfræðingum Navis að hanna stálteikningar fyrir nýtt stórt uppsjávarveiðiskip sem smíðað verður fyrir Færeyinga. Navis hefur átt gott samstarf við Vik og Sandvik á undanförnum árum en þetta nýjasta verkefni er stærsta uppsjávarveiðiskipið sem Navis hefur tekið þátt í að hanna fyrir Vik og Sandvik á undanförnum árum. Gert er ráð fyrir að Navis ljúki gerð stálteikninga skipsins fyrir áramót.

Skipið verður 81,6 metra langt og 16,6 á breidd og að sögn Frímanns Sturlusonar skipatæknifræðings verður það útbúið til hefðbundinna uppsjávarveiða með flottroll og nót, fyrir kolmunna, makríl, síld og loðnu.

Skrokkur skipsins verður að líkindum smíðaður í Tyrklandi en hann síðan fluttur til Danmerkur þar sem lokið verður við smíðina í skipasmiðastöð Karstensens Skipbsverft á Skagen. Miðað er við að smíði skipsins verði lokið í ágúst 2009.

Miklar annir eru nú hjá skipasmíðastöðvum um allan heim að sögn Frímanns og víðast langur biðtími eftir að komast að. Á undanförnum árum hafi Tyrkir hins vegar verið að byggja upp mjög öflugan og þróaðan skipasmíðaiðnað og því sé í auknum mæli leitað með verkefni þangað.